【說故事】岑樂怡專訪︱以自身影響力推動慈善活動 拒定型決心離開ViuTV安舒區
攝影：Hung
場地供應：鏞鏞藝嚐館（尖沙咀）
岑樂怡「樂於助人」的形象非常深入民心，當節目主持也經常幫助動物、關心有需要社群等。最近她就分享到回復自由身之後的新動向，更剖白了決心離開ViuTV的原因，「開始約定俗成，有啲節目會覺得岑樂怡唔會接、唔適合佢，變相個創意限制咗，我就覺得係時候出去行下，睇下個世界係點。」更透露最近由幕前進軍到幕後，向導演夢進發！
作為藝人善用號召力 擔任「星級英雄」
最近岑樂怡擔任聯合國兒童基金會慈善跑「星級英雄」，又透露自己將積極練跑，報名參加了1月4日的5公里賽，身體力行參與：「因為今次主題係講人人都可以是英雄，一同去支援戰亂及貧困國家的小朋友繼續享有教育的機會，我覺得好有意義」。講起慈善工作，其實不論是拍節目還是節目以外，她都著力關注，「我拍咗個節目叫《幫緊你應援團》，係幫好多唔同類型嘅人。之前我就多數去啲動物團體照顧啲狗狗，過時過節就派食物畀無家者、探訪獨居長者。」
其實在社交媒體，都不時見到她作出呼籲，尤其於颱風或暴雨期間，作為藝人的號召力就發揮作用，岑樂怡：「本身自己都喜歡做呢件事，幫到人佢哋開心之餘，其實我都開心。尤其是做呢一行叫做有少少影響力、有啲號召力。有咩需要，例如IG出個story話籌集用品畀啲狗場，都較容易一呼百應。」
從未想過當藝人，不知不覺走入幕前
岑樂怡是一位順勢而行的人，雖然一直都對戲劇感興趣，卻從未想過會做幕前，她回憶道：「都幾奇怪，本身冇諗過入呢行，因為我大學係讀英國比較文學，已經做緊電影研究，對劇本分析同入面嘅文學手法好有興趣。之後上天就安排咗我入娛樂圈做幕前，可能係慢慢咁樣鋪路掛？我係順住走、冇乜計劃嗰啲人，行行下就行到而家。」
好奇問到上天是如何安排？她笑言：「嗰時喺浸大玩戲劇學會，有監製就睇咗套舞台劇，問我有冇興趣入Now TV度做。一開始係做旅遊節目主持、記者，做到ViuTV開台，就有機會拍劇喇。」成為演員後，她陸續都有不少機會，就像今年主演的《弊傢伙！我要去祓魔》，都引起迴響。
剖白離開電視台原因：係時候出去行下
岑樂怡自畢業起已加入Now TV，後來又轉職到ViuTV，前後差不多有十年。她坦言離開不是個容易的決定，自己都思考了很久才下定決心，「對於我嚟講離開當然係個大決定，但當我做咗呢個決定之後，我發現其實個世界都冇乜點變！只不過喺我嘅世界好似好大件事，但慢慢行落，都覺得係小事一則。離開ViuTV呢個安舒區，呢個諗法其實喺我入邊好耐㗎喇，去睇下呢個世界，只係機緣巧合今年年頭發生，咁就讓佢發生。」
在一個地方工作日久，她有感可發展的空間與可能性也不大，成為了她離開的主因，「喺ViuTV入面好多嘢都試過，佢哋覺得某一啲節目或者戲劇係好適合我，我都同意嘅。但開始約定俗成，有啲節目會覺得岑樂怡唔會接、唔適合佢，變相個創意限制咗，我就覺得係時候出去行下，睇下個世界係點。」話雖如此，但其實陸續有劇集宣傳，都會見到她的身影，「其實而家我都成日返ViuTV做嘢！有走同冇走差不多，只係名義上有啲改變。」現時她會專注於入圍了的短片比賽，更擔任導演一職，希望之後以拍電影為目標，由幕前工作拓展到幕後。
